29.1 C
Parāsi
Wednesday, August 10, 2022
spot_img

प्रभावकारी भएन यातायात प्रदूषण मापनयन्त्र

दाङ । दाङस्थित यातायात व्यवस्था कार्यालयमा रहेको सवारी प्रदूषण मापनयन्त्र प्रभावकारी रुपमा प्रयोग हुनसकेको छैन ।

गत वर्ष भदौमा कार्यालयमा उक्त यन्त्र भित्र्याइएको भए पनि अहिलेसम्म ७५ वटामात्रै सवारीसाधनको प्रदूषण मापन गरिएको यातायात कार्यालय दाङका प्रशासन प्रमुख रेश्मीराज अधिकारीले जानकारी दिए ।

‘एक वर्षअघि उक्त यन्त्र भित्र्याइएको हो,’ उनले भने, ‘तर प्रभावकारी रुपमा प्रयोगमा आउन सकेन, अहिलेसम्म ७५ सवारीसाधनको मात्रै प्रदूषण मापन गरिएको छ ।’

सवारी धनीले प्रदूषण मापनको महत्व नबुझ्दा पनि यस्तो समस्या देखिएको उनको भनाइ थियो । ‘प्रायः गाडी काठमाडौंमै प्रदूषण मापन गरेर आउने गरेका छन्,’ उनले भने, ‘यसले गर्दा पनि दाङमा प्रदूषण मापन गर्नेको सङ्ख्यामा कमी आएको हो ।’

यातायात व्यवस्था कार्यालय दाङले ट्राफिक प्रहरीसँग समन्वय गरी सवारीसाधनको यन्त्र ठीक भएमा हरियो स्टिकर लगाउने व्यवस्था गरेको छ । गाडीको धुवाँले वातावरणमा कति असर गरिरहेको छ, भन्ने पत्ता लगाउनका लागि कालो धुँवा मापन गर्ने गरिन्छ ।

पहिले यो सेवाका लागि काठमाडौं नै जानुपर्थ्यो तर दाङमै यो सुविधा हुँदा पनि प्रभावकारी प्रयोग नदेखिएको उनको भनाइ थियो । गाडीको प्रदूषण मापन यातायात व्यवस्था विभागले अनिवार्य बनाएको छ ।

हरेक सवारीसाधनको छ/छ महिनामा प्रदूषण जाँच गराउनु पर्दछ । एक–पटक जाँचेको ३५ मात्रै राजश्व लाग्छ । मोटरसाइकलबाहेक सार्वजनिक, निजी सबै सवारीसाधनको अनिवार्य प्रदूषण मापन गरिन्छ ।

जाँचपश्चात् सवारीसाधनको इञ्जिन सही भए/नभएको प्राविधिकले परीक्षण गर्दछन् । सही भए हरियो स्टिकर टाँसी चलाउन अनुमति दिइन्छ भने कुनै समस्या भए बनाउन सुझाव दिइन्छ ।

उक्त यन्त्र यातायात व्यवस्था कार्यालय दाङमै राखिएको छ । अहिलेसम्म ट्राफिकलाई स्टिकर लगाएको÷नलगाएको बारेमा जाँच्नका लागि कुनै निर्देशन नभएको ट्राफिक प्रहरी कार्यालय दाङका सूचना अधिकारी उत्तमकुमार जिसीले बताए । स्टिकर लगाएको, नलगाएको बारेमा अनुगमन गर्न कुनै निर्देशन नदिएको भन्दै अहिलेसम्म कुनै पनि सवारीलाई कारबाही नगरिएको उनको भनाइ छ ।

मोटरसाइकलबाहेक अन्य सवारीधनीले आफ्नो सवारीसाधनमा हरियो स्टिकर नलगाए कारबाही हुने भनिए पनि अधिकांश सवारीसाधनमा हरियो स्टिकर नलगाएको पाइएको समेत उनको भनाइ छ ।

थप समाचार

ताजा खबर